Литургия святого апостола Иакова

Священнослужители облачаются и становятся в диаконнике. Священные книги [Евангелие, Апостол, Ветхий Завет (Библия)] полагаются на аналой в центре диаконника. Свет в алтаре погашен.

Предстоятель и сослужащие читают вполголоса молитвы, оставаясь в диаконнике:

Предстоятель тихо:

Оскверненнаго грехами многими, да не презриши мене, Владыко Господи Боже наш. Се бо приступих к божественному сему и пренебесному Твоему таинству, не яко сый достоин, но взирая на Твою благостыню. Глас Ти пущаю: Боже, милостив буди мне грешному: согреших на небо и пред Тобою, и несмь достоин воззрети на святую Твою сию и духовную трапезу, на нейже Единородный Твой Сын и Господь наш Иисус Христос, мною грешным и всякою скверною окалянным, тайно предлагается в жертву. Сего ради Тебе моление и благодарение приношу: ниспосли мне Духа Твоего Утешителя, укрепляющаго, утверждающаго мя к службе сей, и сподоби мя неосужденно проповедати людем возвещенный ми от Тебе глас, во Христе Иисусе Господе нашем, с Нимже благословен еси со Всесвятым и Благим и Животворящим и Единосущным Твоим Духом, ныне и присно, и во веки веков.

Клир: Аминь.

Слава Отцу и Сыну и Святому Духу, Трóичному и Еди́ничному свету Божества, сущаго в Троице еди́ничне и разделяемаго нераздельне. Троица бо един Бог Вседержитель, Егоже славу небеса поведают, земля же Его владычество, и море Его державу, и всякая чувственная и умная тварь Его величество непрестанно проповедает. Яко тому подобает всякая слава, честь, держава, величие же и великолепие, ныне и присно, и во веки веков.

Клир: Аминь.

Благодетелю и Царю веков, и всея твари Создателю, приими приходящую к Тебе чрез Христа Твоего Церковь Твою. Каждому полезное даруй, приведи всех к совершенству, и достойными нас соделай благодати освящения Твоего, собирая нас во святую твою соборную и апостольскую Церковь, юже стяжал еси честною кровию Единороднаго Сына Твоего, Господа же и Спаса нашего Ииуса Христа, с Нимже благословен еси и препрославлен со Всесвятым и Благим и Животворящим Твоим Духом, ныне и присно, и во веки веков.

Клир: Аминь.

Диакон: Господу помолимся.

Алтарник подает кадило.

Боже, приемый Авелевы дары, Ноеву и Авраамову жертву, Аapoново и Захариино кадило, приими и от рук нас грешных фимиам сей в приятное благоухание – в прощение грехов наших и всех людей Твоих. Яко благословен еси, и подобает Тебе слава, Отцу и Сыну и Святому Духу, ныне и присно, и во веки веков.

Клир: Аминь.

Предстоятель гласно:

Щедрый и милостивый, долготерпеливый и многомилостивый и истинный Господи! При́зри от святаго жилища Твоего и услыши нас молящихся Тебе, и избави нас от всякаго искушения диавольскаго же и человеческаго, и не отстави от нас помощь Твою, и не наведи на нас наказания, превосходящаго силы наша. Ибо не имеем довольно сил побеждати противная. Ты же силен еси, Господи, спасати от всех противлений. Спаси нас, Боже, от бедствий мира сего по благости Твоей, яко да пришедше в чистей совести ко святому Твоему жертвеннику, блаженную и трисвятую песнь с пренебесными силами неосужденно возслем Ти, и благоприятную Ти и божественную совершив службу, сподобимся вечныя жизни.